Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (73) Հոկտեմբեր 2017

Յօդուածներ

ԼԻԲԱՆԱՆԱՀԱՅ ՏՆՏԵՍԱԳԷՏ ՄԿՐՏԻՉ ՊՈՒԼՏՈՒՔԵԱՆ ՄԱԿԱԳՐԵՑ ԻՐ ՆՈՐ ԳԻՐՔԸ

antsoutarts1a
 
Հինգշաբթի, 12 Հոկտեմբեր 2017-ի երեկոյեան, մայրաքաղաք Պէյրութի ամենահռչակաւոր գրախանութներէն՝ «Լիպրերի Անթուան»ի մէջ, ի ներկայութիւն Լիբանանի մէջ օտար պետութիւններու դեսպաններու, դիւանագէտներու, պետական անձնաւորութիւններու, դրամատուներու տնօրէններու, դասախօսներու, մտաւորականներու եւ բարեկամներու, լիբանանահայ ծանօթ տնտեսագէտ Մկրտիչ Պուլտուքեան ընթերցասէր հասարակութեան մակագրեց իր նոր գիրքը՝ «Armenian Bankers In The Ottoman Empire»:
Արխիւային նիւթերով հարուստ, բծախնդրութեամբ պատրաստուած այս ուսումնասիրութիւնը կը ներկայացնէ Թուրքիոյ տնտեսական բարգաւաճումին մէջ հայ սեղանաւորներու դերակատարութիւնը, անոնց նախաձեռնութիւնները, մուծած նորարարութիւնները եւ ներդրումները, հայ ժողովուրդին հանդէպ թուրք իշխանութիւններու անմարդկային արարքները, ֆիզիքական հաշուեյարդարին զուգահեռ, յափշտակուած դրամագլուխը:
Գիրքին նախաբանին մէջ Մկրտիչ Յ. Պուլտուքեան հայ երիտասարդութեան կը թելադրէ խոր գիտակցութեամբ ուսումնասիրել թուրքերու կողմէ հայ ժողովուրդէն յափշտակուած դրամագլուխը եւ աննահանջ շարունակել պահանջատիրական պայքարը:
Անգլերէն հրատարակութիւնը, լիբանանահայ ծանօթ տնտեսագէտ, տնտեսական հարցերու մեկնաբան, տնտեսական բազմաթիւ գիրքերու եւ ուսումնասիրութիւններու հեղինակ, դասախօս՝ Մկրտիչ Յակոբ Պուլտուքեանի՝ «Հայ Սեղանաւորներ Միջին Արեւելքի Տարածքին, Պոլիսէն մինչեւ Պէյրութ» ( 2012) արժէքաւոր ուսումնասիրութեան անգլերէն տարբերակն է, որոշակի փոփոխութիւններով եւ լրացումներով:Գիրքին արաբերէն լեզուով հրատարակութիւնը լոյս տեսաւ 2015-ին,որուն յաջորդեց փայլուն շնորհանդէս մը «Biel»ի մէջ:
Արդէն իսկ պատրաստութեան վրայ է սոյն աշխատութեան թրքերէն տարբերակը:
Մկրտիչ Յակոբ Պուլտուքեան ծանօթ հեղինակութիւն մըն է միջազգային տնտեսագիտութեան մէջ: Ան երկար տարիներ վարած է Լիբանանի Կեդրոնական Դրամատան փոխկառավարիչի պաշտօնը (1985-1990): Բազմիցս Լիբանանը ներկայացուցած է Միջազգային Ելեւմտական Հիմնարկին (IMF ) եւ տնտեսական միջազգային այլ կառոյցներու մէջ: Ան, մինչեւ օրս կը մասնակցի տնտեսական միջազգային խորհրդաժողովներու, իբրեւ դրամատուներու խորհրդատու եւ հմուտ տնտեսագէտ: