Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (117) Հոկտեմբեր 2021

Կիպրահայ

ՀՀ ԱԶԳԱՅԻՆ ԺՈՂՈՎԻ ՊԱՏՈՒԻՐԱԿՈՒԹԵԱՆ ՊԵՏԱԿԱՆ ԱՅՑԸ ԿԻՊՐՈՍ

Հոկտեմբեր 24-26 օրերուն, Կիպրոս այցելած է ՀՀ Ազգային Ժողովի պատուիրակութիւնը, գլխաւորութեամբ Ազգային Ժողովի նախագահ Տիար Ալեն Սիմոնեանի: Այցի շրջանակներէն ներս, ՀՀ ԱԺ նախագահ Ալեն Սիմոնեանի գլխաւորած պատուիրակութիւնը հանդիպում ունեցած է Նիկոսիոյ քաղաքապետ Կոնստանտինոս Եորկաճիսին:
Քաղաքապետը, ողջունելով հիւրերուն, նշեր է որ հայ-կիպրական յարաբերութիւնները օրինակելի են բոլոր ասպարէզներու մէջ:
ԱԺ նախագահը շնորհակալութիւն յայտներ է քաղաքապետին ընդունելութեան համար, նշելով որ հայ-կիպրական բարեկամական յարաբերութիւններուն նպաստող գործօններէն է նաեւ Կիպրոսի հայ համայնքը:
Կողմերը քննարկեր են մայրաքաղաքային կեանքին մէջ հայ համայնքի ընդգրկուածութեան ու դերակատարութեան վերաբերող հարցեր: Նիկոսիոյ քաղաքապետին խօսքով՝ հայ համայնքի կենսագործունէութիւնը եւ աշխուժութիւնը կը համարուին Կիպրոսի հասարակական-քաղաքական կեանքի բաղկացուցիչ մասը: Ան աւելցուցած է, որ հայկական մշակոյթը Կիպրոսի մշակութային ամբողջականութեան դասական ուղղութիւններէն է:
Զրուցակիցները քննարկեր են կրթութեան, մշակոյթին եւ հանրային փոխադարձ հետաքրքրութիւններուն առնչուող հարցեր:
Հայաստանը միջազգային հարթակներու վրայ շարունակելու է աջակցիլ Կիպրոսին․
ՀՀ Ազգային ժողովի նախագահ Ալեն Սիմոնեանի գլխաւորած պատուիրակութիւնը Հոկտեմբեր 25-ին հանդիպեր է նաեւ Կիպրոսի Հանրապետութեան արտաքին գործերու նախարար Նիկոս Խրիստոտուլիտիսի հետ: ՀՀ ԱԺ նախագահը բարձր գնահատեր է երկկողմ եւ բազմակողմ ձեւաչափով երկու երկիրներու արդիւնաւէտ համագործակցութիւնը: Ան մեծապես կարեւորեր է Կիպրոս-Հայաստան-Յունաստան խորհրդարանական համագործակցութեան ձեւաչափի շուտափոյթ մեկնարկը՝ յատկապէս 44-օրեայ պատերազմէն ետք ստեղծուած իրավիճակին մէջ:
Կողմերը անդրադարձեր են Կիպրոսի հիմնահարցին: ՀՀ ԱԺ նախագահը նշեր է, որ Հայաստանը միջազգային կազմակերպութիւններու շրջագիծէն ներս շարունակելու է աջակցիլ Կիպրոսին եւ կողմ է բանակցութիւններու ճանապարհով խնդրի խաղաղ կարգաւորման` հիմք ընդունելով ՄԱԿ-ի բանաձեւերու սկզբունքները: Երկուստեք արձանագրուեր է ընել առաւելագոյնը համագործակցութիւնն ու բարեկամութիւնը առաւել ամրապնդելու ուղղութեամբ:
Զրուցակիցները քննարկեր են կիպրական կողմի ներդրումային հնարաւորութիւնները` կարեւորելով Կիպրոսի հետ տնտեսական եւ զբօսաշրջային համագործակցութիւնը:
Աղբիւր՝ tert.am
 

Լարուած իրավիճակ «Հիլթոն» հիւրանոցին դիմաց

Նոյն օրը, Նիկոսիոյ Հիլթոն պանդոկին առջեւ լարուած իրավիճակ տիրած է:
Կիպրոսի ՀՅԴ անդամներ բողոքի ձայն բարձրացուցած են Ալեն Սիմոնեանի եւ անոր գլխաւորած պատուիրակութեան Կիպրոս կատարած այցին դէմ։
Բողոքի ձայն բարձրացնողները «Դաւաճան, հողատու ...» բառերը վանկարկելով պահանջած են պատուիրակութեան արագ հեռացումը Կիպրոսէն։
Աւելի ուշ անոնց մօտեցած է խորհրդարանի անդամ՝ Բաբգէն Թունեան, որ փորձած է երկխօսութեան մէջ մտնել բողոքաւորներուն հետ, որոնք դարձեալ ընդդիմացած են եւ պահանջած, որ Ալեն Սիմոնեան մօտենայ իրենց։
Նշենք նաեւ, որ բողոքի հաւաքին ընթացքին շրջան հասած են ոստիկանութեան ուժեր իրավիճակը վերահսկողութեան տակ պահելու նպատակով։
Արձանագրենք, որ Կիպրոս գտնուող պատուիրակութիւնը առ ի հետեւանք եղած ճնշումներուն չէ կարողացած հանդիպում ունենալ գաղութային մակարդակի որեւէ կառոյցի կամ ներկայացուցչական մարմնի հետ։
Բողոքարկողները չէին վարանած նոյնիսկ Նիկոսիոյ Նարեկ հայկական վարժարանը զերծ պահել այս բոլորէն եւ կիրքեր հրահրող նկար մը դրած էին վարժարանի դարպասին, գաղտագողի կերպով, առանց Հոգաբարձութեան եւ Տնօրէնութեան թոյլտուութեան:
Այս առիթով, Կիպրոսի Սոցիալ Դեմոկրատ Հնչակեան Կուսակցութիւնը հետեւեալ յայտարարութիւնը հրապարակած է «Առաւօտ» թերթին մէջ 25 Հոկտեմբերին. «Կիպրոսի Սոցիալ Դեմոկրատ Հնչակեան Կուսակցութեան անունով կ'ողջունենք` Հայաստանի Ազգային Ժողովի նախագահ՝ Տիար Ալեն Սիմոնեանի պետական այցը Կիպրոս և միեւնոյն ատեն անընդունելի կը համարենք, կարգ մը անձանց կողմէ անոր այցի դէմ բողոքի ակտը` համայն կիպրահայութեան անունով ներկայացնելու միտումը: Մենք կը կարեւորենք Հայաստան-Կիպրոս կապերու աւելի ամրապնդումն ու խորացումը և տարակուսելի կը գտնենք` Հայաստանի ներքին քաղաքական տարակարծութիւնները՝ Հայաստանի և հայութեան բարեկամ երկրի մը հանրութեան սեփականութիւնը դարձնելու ճիգը, որ միայն կը վնասէ Հայաստանի Հանրապետութեան միջազգային վարկին և հեղինակութեան: Անգամ մը եւս կ'ուզենք շեշտել, որ Հայաստանի և Արցախի համար այս ճակատագրական ժամանակահատուածին, օրուայ գլխաւոր հրամայականը միասնականութիւնը և համախմբուածութիւնն է»:
Նոյնանման հաղորդագրութեամբ հանդէս եկած է Հ.Բ.Ը.Միութեան Նիկոսիոյ Մասնաճիւղը:
«Ազատ Խօսք»ը կը միանայ ՍԴՀԿ եւ ՀԲԸՄ-ի հաղորդագրութեանց միտք բանիին եւ անընդունելի կը գտնէ ՀՅԴ Կիպրոսի կարգ մը անդամներու ընդվզումի խայտառակ ակցիան, անվայել վանկարկումներն ու պահուածքը՝ ՀՀ պետութիւնը ներկայացնող պատուիրակութեան այցին դէմ, յաչս օտարներուն մասնաւորապէս, ինչ որ կը խաթարէ մեր վարկը, միաժամանակ «Ազատ Խօսք»ը կ'ընդգծէ որ ցուցարարները երբեք չեն ներկայացներ կիպրահայ համայնքը եւ իրաւունք չունին խօսելու անոր անունով:
1in.am-ին հետ տուած իր հարցազրոյցին մէջ, Ազատ Խօսքի խմբագիրը յատկապէս ըսած է. «Համայնքէն ներս շատերը համաձայն չեն, որ այս տեսակ խայտառակութիւն կազմակերպուեր է: Ես առնուազն կրնամ խօսիլ իմ անունով, եւ նշել որ սա խայտառակութիւն էր: Ես կողմ եմ քաղաքակիրթ բանավէճի, տեսակետներու փոխանակման: Պէտք է փորձել զիրար հասկնալ և մանաւանդ փորձել բռունցքուիլ, երբ ճակատագրական օրեր կ'ապրի այսօր մեր հայրենիքը: Սա չի նշանակեր, որ ես համաձայն եմ Հայաստանի կառավարութեան բոլոր քայլերուն, բոլորս ալ սխալներ ունինք, որոնց համար պէտք է խօսիլ, պարզաբանել տեսակէտները եւ ընդհանուր համաձայնութիւն գոյացնել»: Եւ աւելցուցած է. «Երբ կը նայիս ընդդիմադիր թերթերուն, կայքերուն, երբեմն նոյնիսկ կ'ամչնաս հայ ըլլալուդ համար, երբ հայհոյանքներ, անէծքներ, զազրախօսութիւններ, անկիրթ խօսքեր կը կարդաս: Ի՞նչ է պատահեր մեր ժողովուրդին, դարերէն եկած մեր քաղաքակրթութեան ի՞նչ եղաւ: Ուրեմն թուրքը յաղթած է, որ կարողացաւ մեզ հունէն հանել և այս վիճակին բերել: Պէտք է յաղթահարենք այս վիճակը, քաղաքակիրթ ձեւով զիրար հասկնանք և համաձայնութեան գանք որպես ազգ ու հայրենիք»:
Համադրեց՝ Երան Գույումճեան