Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (96) Նոյեմբեր 2019

Այլազան

Հայաստանի մէջ բացուած է կարի չորս մեծ գործատուն

Համաշխարհային վաճառանիշերը` «Made in Armenia» մակնիշով

antsoutarts1aՀամաշխարհային կարգ մը վաճառանիշերու հագուստները այսուհետեւ պիտի արտադրուին Հայաստանի մէջ եւ արտածուին եւրոպական ու ռուսական շուկայ` «Պատրաստուած է Հայաստանի մէջ» մակնիշով: «Արմէնփրէս»-ի համաձայն` Sartex, Asa Garment, Alex Textile and Texas Production ընկերութիւններու կարի 4 գործատուներու բացումը տեղի ունեցած է Նոյեմբեր 1-ին: Ներկայ եղած է ՀՀ վարչապետ Նիկոլ Փաշինեան, որ ծանօթացած է արտադրական գործընթացին, արտադրանքին:
"Այստեղ ապագային պիտի աշխատի աւելի քան 3000 հոգի: Արտադրանքը հիմնականօրէն պիտի արտածուի եւրոպական, նաեւ ռուսական շուկայ։ Բոլոր ապրանքները «Made in Armenia» մակնիշով են", ըսած է «Ասա Կարմենթ», «Ալեքս թեքսթիլ» եւ «Թեքսաս փրոտաքշըն» ընկերութիւններու Հայաստանի տնօրէն Մարատ Մովսիսեան:
"«Սարթեքս» ընկերութիւնը հիմնադրած են իտալական «Սարթիս» եւ հայկական «Ալեքս թեքսթիլ» ընկերութիւնները: «Սարթեքս»-ը կը հանդիսանայ Հայաստանի մէջ իտալական «Սարթիս»-ի ներկայացուցիչը: Ընկերութիւնը կը զբաղի ծանօթ MaxMara, Moncler, Peuterey, Dolce&Gabana, Dainese եւ այլ հանրածանօթ վաճառանիշերու հագուստի արտադրութեամբ: Անոնք կ՚արտածուին Իտալիա, ուրկէ ալ ամբողջ եւրոպական շուկայ: Մեր նպատակն է ստեղծել այնպիսի մշակոյթ, որ Հայաստանի մէջ հիւսուածեղէնը չզարգանայ միայն աւելի աժան աշխատուժի պատճառով: Մենք կ՚ուզենք, որ «Made in Armenia» ապրանքային նշանը ըլլայ որակի երաշխաւոր", բացատրած է ընկերութեան տնօրէն Մխիթար Աղաբէկեան:
Ընկերութիւնը այժմ արդէն ունի 400 աշխատատեղ, կը նախատեսեն արտադրական 7 հոսքագիծէն (chaîne) հասնիլ մինչեւ 40 հոսքագիծի, որ կարելիութիւն պիտի ընձեռէ ստեղծելու մինչեւ 2500 աշխատանք: Ներկայիս ընկերութեան մէջ աշխատավարձի երկու սանդխակ կայ` 100 հազար դրամ եւ 70 հազար դրամ: 70 հազար կը ստանան անոնք, որոնք դերձակի փորձառութիւն չունին: Սակայն ընկերութեան նախաձեռնութեամբ վերապատրաստումներէ ետք հետագային աշխատավարձերը պիտի բարձրանան` հասնելով մինչեւ 170-180 հազար դրամի:
Նորաբաց «Ասա Կարմենթ»-ը հայ-չինական ընկերութիւն է, որ այս պահուն կը զբաղի ֆրանսական Jennifer վաճառանիշի հագուստներու արտադրութեամբ: Ընկերութիւնը բանակցութիւններ կը վարէ նաեւ ZARA ապրանքանիշին հագուստ արտադրելու համար: Այս պահուն ան ունի 300 աշխատող, շուտով աշխատակիցներու թիւը պիտի հասնի մինչեւ 1000-ի:
«Ալեքս թեքսթիլ»-ը հագուստ կ՚արտադրէ ռուսական ընկերութիւններու համար, իսկ «Թեքսաս փրոտաքշըն»-ը շապիկներ կ՚արտադրէ թէ՛ ռուսական, թէ՛ եւրոպական վաճառանիշերու համար:
"Այսօր կրնանք հաստատել, որ հայկական արտադրանքը մրցունակ է արտասահմանի շուկաներուն մէջ եւ մեզի համար հպարտանալու առիթ է, որ աշխարհի տարբեր ծայրերուն կարելի է գնել հագուստ եւ պիտակին վրայ կարդալ` «Արտադրուած է Հայաստան»", ըսած է «Ալեքս թեքսթիլ»-ի սեփականատէր Աստղիկ Ալեքսանեան: