Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (96) Նոյեմբեր 2019

Այլազան

"Իւրաքանչիւր համալսարան իրաւասու է «Հայոց լեզու», «Հայոց պատմութիւն» նիւթերը դարձնելու պարտադիր"

antsoutarts1a«Բարձրագոյն կրթութեան եւ գիտութեան մասին» ՀՀ օրէնքի աշխատանքային նախագիծով իւրաքանչիւր բուհ (Բարձրագոյն ուսումնական հաստատութիւն-համալսարան) իրաւասու է «Հայոց լեզու», «Հայ գրականութիւն» եւ «Հայոց պատմութիւն» նիւթերը դարձնելու պարտադիր: Այս մասին կը նշուի ՀՀ կրթութեան, գիտութեան, մշակոյթի եւ մարզանքի նախարարութեան (ԿԳՄՄՆ) տարածած պարզաբանութեան մէջ:
«Ի պատասխան "ՀՀ բարձրագոյն կրթութեան եւ գիտութեան մասին" ՀՀ օրէնքին` ՀՀ ԿԳՄՄՆ-ի ներկայացուցած աշխատանքային տարբերակին մէջ "Հայոց լեզու", "Հայ գրականութիւն" եւ "Հայոց պատմութիւն" նիւթերը բուհերուն մէջ ուսուցանուող պարտադիր առարկաներու ցանկէն հանելու առաջարկին վերաբերեալ հարցումներուն եւ առկայ դժգոհութիւններուն, կը յայտնենք․
- Թէեւ աշխատանքային քննարկման նպատակով ուղարկուած օրէնքի նախագիծին վերաբերեալ բուհերէն այս հարցումին առնչուող դիտողութիւններ ու առաջարկներ գրեթէ չեն ստացուած, սակայն օրէնքի նախագիծով լայն ինքնավարութիւն կը տրուի բուհերուն` որոշելու ուսումնական եւ գիտական ծրագրերու բովանդակութիւնը: Հետեւաբար, նախագիծի ընդունումէն ետք իւրաքանչիւր բուհի գիտական խորհուրդը կրնայ որոշում կայացնել, որ այս առարկաները պարտադրաբար պէտք է դասաւանդուին բոլոր բաժանմունքներուն մէջ:
- Միեւնոյն ժամանակ, նախագիծի աշխատանքային տարբերակին մէջ առկայ սկզբունքներուն յստակ ամրագրուած են հայագիտական հետազօտութիւններու գերակայութիւնը, Սփիւռքի համար հայագիտութեան զարգացման ու հայ մշակութային ժառանգութեան ճանաչման տարածման նպատակով մասնագէտներու պատրաստումը, ազգային ինքնութեան եւ համամարդկային արժէքներու արմատաւորումը:
- Նախատեսուած է հիմնական ֆինանսաւորման տրամադրում բուհերուն` ազգային արժէք ներկայացնող գիտական ենթակառոյցներու պահպանման ու զարգացման նպատակով:
- Աւելին` Հայաստանի մէջ որեւէ բուհ ընդունուելու համար ՀՀ քաղաքացիները, անկախ ընտրած մասնագիտութենէն, պարտաւոր են յանձնելու Հայոց լեզուի միասնական քննութիւն:
Այսպէսով, օրէնքի նախագիծը ոչ թէ կը նուազեցնէ հայերէնի եւ հայրենագիտութեան դերը, այլ ընդհակառակն, կ՚ամրագրէ այս կարեւոր արժէքներու սերմանումն ու համապատասխան մասնագէտներու պատրաստումը», կը նշեն ԿԳՄՄ նախարարութենէն:
Աղբիւր՝ ՆՈՐ ՅԱՌԱՋ