Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (95) Հոկտեմբեր 2019

Այլազան

ԵՐԵՒԱՆ

WCIT-2019

ՏԵՂԵԿԱՏՈՒԱԿԱՆ ԱՐՀԵՍՏԱԳԻՏՈՒԹԵԱՆՑ ՀԱՄԱՇԽԱՐՀԱՅԻՆ 23-ՐԴ ՀԱՄԱԺՈՂՈՎԸ ՀԱՄԱԽՄԲԱԾ Է 70 ԵՐԿՐԷ ԱՒԵԼԻ ՔԱՆ 2500 ՀՈԳԻ

antsoutarts1aՀոկտեմբեր 6-ի երեկոյեան, Երեւանի սրտին՝ Հանրապետութեան հրապարակին վրայ կատարուած համերգային ծրագրով ազդարարուած է Տեղեկատուական արհեստագիտութեանց (ՏԱ) միջազգային համագումարի՝ WCIT-2019-ի բացումը։ Իսկ Հոկտեմբեր 7-ին Երեւանի «Կարէն Դեմիրճեան» մարզահամերգային համալիրին մէջ տեղի ունեցած է պաշտօնական բացման արարողութիւնը։ Այս առթիւ ունեցած իր ելոյթին, դիմելով համաժողովի հիւրերուն՝ վարչապետ Փաշինեան ընդգծած է, որ կը հաւատան, թէ Հայաստանը կրնան դարձնել դրախտ՝ տաղանդաւոր մարդոց համար եւ յոյս յայտնած է, որ այս իրադարձութիւնը շատ բան պիտի փոխէ արհեստագիտութիւններու աշխարհի եւ ՀՀ-ի յարաբերութիւններուն մէջ։ «WCIT-2019» կազմակերպչական կոմիտէի նախագահ Ալեքսանդր Եսայեան բացման խօսքին մէջ ըսած է. "Այսօր ինծի համար մեծ պատիւ է ողջունել ձեզ Հայաստանի մէջ: Տարիներ առաջ մենք կրցանք յաղթել մեր առաջարկով եւ այս կարեւոր համաժողովը բերել Հայաստան։ Հայաստանը յառաջիկայ երեք օրերուն պիտի ըլլայ արհեստագիտութիւններու կեդրոն: Ես շատ ուրախ եմ ողջունելով մեր բոլոր հիւրերը, որոնք եկած են աշխարհի տարբեր երկիրներէ։ Բարի գալուստ մեր երկիր"։ Օրուան ընթացքին կատարուած են շարք մը քննարկումներ, որոնց զուգահեռ տեղի ունեցած են տարբեր ձեռնարկներ:
ՏԱ համաշխարհային համաժողովը հիմնադրած է Տեղեկատուական արհեստագիտութիւններու եւ ծառայութիւններու համաշխարհային դաշինքը: Համաժողովը կը կազմակերպէ Առաջատար արհեստագիտութիւններու ձեռնարկութիւններու միութիւնը:
Այս տարի «WCIT» ՏԱ համաշխարհային համաժողովի թեման էր` «Ապակեդրոնացման ուժը. ակնկալիք եւ վտանգ»: Հոկտեմբեր 6-էն 9 տեղի ունեցած համաժողովի ընթացքին քննարկուեցան, թէ ինչպէ՛ս տեղեկատուական եւ հաղորդակցութեան արհեստաիտութիւնները թէ՛ դրական, թէ՛ բացասական առումներով կը վերափոխեն մեր կեանքը, ինչ ազդեցութիւն կ՚ունենան շահի եւ բարեկեցութեան, ապահովութեան եւ անվտանգութեան, ժողովրդավարութեան եւ մարդասիրութեան վրայ: Երեւանեան այս համաժողովին մասնակցած է 70 երկրէ աւելի քան 2500 հոգի:
Համաժողովին յատուկ զեկոյցով հանդէս եկած է Հայաստան ժամանած աշխարհահռչակ Քիմ Քարտաշեան: «Գաղափարներու շուկայ» խորագրով քննարկման՝ ան որպէս ընկերային ցանցերու մէջ ամենաշատ հետեւորդներ ունեցող անձերէն մին, բաժնած է իր փորձառութիւնը եւ ներկայացուցած է, թէ ինչպէ՛ս կարելի է այդ հարթակները օգտագործել գործի զարգացման համար: