Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (84) Հոկտեմբեր 2018

Այլազան

ՆԻՒ ԵՈՐՔ

ՀՀ Վարչապետը այցելած է

Մեթրոփոլիթէն թանգարանին մէջ բացուած «Արմենիա» ցուցահանդէսըantsoutarts1a

Վարչապետ Փաշինեան, Ամենայն Հայոց կաթողիկոս Գարեգին Բ.ի հետ այցելած է Նիւ Եորքի ծանօթ Մեթրոփոլիթէն թանգարանին մէջ բացուած «Արմենիա» խորագիրով ցուցահանդէսը: Վարչապետը շրջած է ցուցասրահներուն մէջ, ծանօթացած՝ ներկայացուած հայկական արուեստի ու մշակոյթի լաւագոյն նմուշներուն՝ սկսած 4-րդ դարէն մինչեւ 17-րդ դար:
Ան նշած է, որ 2018 թուականը խորհրդանշական տարի է, որուն ընթացքին զգալիօրէն ամրապնդուած են հայ-ամերիկեան մշակութային կապերը: "Այս տարի հայկական մշակոյթը կը ներկայացուի Ամերիկայի Միացեալ Նահանգներու մէջ աննախադէպ ձեւով՝ մօտեցնելով Հայաստանի մշակութային եւ քաղաքակրթական ժառանգութիւնը մեր ամերիկացի բարեկամներուն։ Այս տարի կը նշուի ամերիկեան հողի վրայ հայկական ներկայութեան 400-ամեակը։ 1618 թուականին, առաջին Հայը՝ Մարթին անունով, հասած է Վիրճինիայի ափերը եւ բնակութիւն հաստատած՝ Ճէյմսթաունի մէջ։ Այդ օրէն ի վեր, մեր հայրենակիցներուն ներկայութիւնը այս հողին վրայ չէ ընդհատուած, ինչպէս եւ անոնց ներդրումը իրենց նոր հայրենիքի մշակոյթին մէջ։ Այս տարուան ընթացքին հայկական մշակոյթը՝ սովորութիւններն ու աւանդութիւնները ցուցադրուեցան Ուաշինկթընի ազգային Մոլին մէջ, Սմիթսընեան ժողովրդական կեանքի փառատօնի ծիրէն ներս։ Անիկա մեզի աննախադէպ կարելիութիւն ընձեռեց հայկական մշակոյթը իր իւրայատուկ բազմազանութեամբ ներկայացնելու ամերիկեան հանրութեան, ինչպէս նաեւ աշխարհի տարբեր անկիւններէ ժամանած հազարաւոր զբօսաշրջիկներու։ Քանի մը շաբաթ առաջ, մեր երկու ժողովուրդները միասին նշեցին Փուլիցերեան մրցանակակիր, թատերագիր եւ գրող Ուիլիըմ Սարոյեանի ծննդեան 110-ամեակը։ Անոր ժառանգութիւնը նշելու նպատակով, որ մեծ արժէք է մեր երկու ժողովուրդներուն համար, հեղինակի հայրենի Գալիֆորնիա նահանգի Ֆրեզնօ քաղաքին մէջ բացուեցաւ իր անունը կրող թանգարանը։ Իբրեւ Միացեալ Նահանգներու մէջ Հայաստանի համար այս աննախադէպ մշակութային տարուան գագաթնակէտ՝ այժմ ես մեծ պատիւն ու անձնական ուրախութիւնն ունիմ ականատես ըլլալու այս իւրայատուկ ցուցահանդէսի բացման, շատ առումներով եզակի ցուցահանդէս մը", ըսած է վարչապետը։
Ան նշած է, որ ցուցահանդէսին ներկայացուած 14 դարերու հայկական ժառանգութիւնը՝ իր անգին գլուխ-գործոցներով, հաւաքուած՝ ամբողջ աշխարհէն, այժմ ներկայացուած է Մեթրոփոլիթէնի` աշխարհի ամենակարեւոր թանգարաններէն մէկուն մէջ: Փաշինեան համոզում յայտնած է, որ անիկա, անկասկած, Միացեալ Նահանգներու մէջ պիտի փոխէ Հայաստանի եւ հայկական արուեստի նկատմամբ ընկալումն ու գնահատականը: "Այս նախաձեռնութեան շնորհիւ՝ Մեթրոփոլիթէնի տասնեակ հազարաւոր այցելուներ պիտի ծանօթանան մեր ազգի պատմական եւ մշակութային ժառանգութեան, որ առաջինը ընդունած է քրիստոնէութիւնը իբրեւ պետական կրօն։ Այսօր կը ներկայացուին աւելի քան 140 նմուշներ՝ պատկերազարդ ձեռագրեր, եկեղեցիներու մանրանկարներ, խաչքարեր, տպագիր գիրքեր եւ այլ եզակի ցուցանմուշներ, ներառեալ՝ Թորոս Ռոսլինի, Սարգիս Պիցակի, Թորոս Տարօնացիի, Յակոբ Ջուղայեցիի, Գրիգոր Տաթեւացիի ստեղծագործութիւնները", ըսած է վարչապետը: Ան աւելցուցած է, որ ցուցահանդէսը հնարաւոր դարձած է շնորհիւ տիկին Հելեն Էվանսի եւ անոր գործընկերներու ջանքերուն: Փաշինեան շնորհակալութիւն յայտնած է նաեւ թանգարանի նախագահ Տանիէլ Վայսին, թանգարանի տնօրէն Մաքս Հոլիին, ձեռնարկը համակարգողներուն, ինչպէս նաեւ բոլոր անհատ նուիրատուներուն, հիմնադրամներուն, Երուսաղէմի եւ Պոլսոյ Հայոց պատրիարքարաններուն, Մայր Աթոռ Սուրբ Էջմիածինին: