Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (83) Սեպտեմբեր 2018

Այլազան

Ազրպէյճան

կը փափաքի Իսրայէլէն յաւելեալ զէնքեր գնելantsoutarts1a

Իսրայէլի Պաշտպանութեան նախարար Աւիկտոր Լիպերման անցեալ շաբաթ Ազրպէյճան այցելած էր հանդիպումներ ունենալու համար երկրի նախագահ Իլհամ Ալիեւի եւ ուժային նախարարութիւններու ղեկավարներուն հետ:
«Պի.Պի.Սի.» կը գրէ, թէ Ազրպէյճան այն հազուագիւտ իսլամական երկիրներէն է, որ լաւ յարաբերութիւններ ունի Իսրայէլի հետ եւ երկար տարիներէ ի վեր իսրայէլեան զէնքեր կը գնէ: Փորձագէտներու կարծիքով՝ այս այցելութիւնը եւս կապ ունէր այդպիսի գործակցութեան մը սերտացման հետ:
"Ազրպէյճան չի ծածկեր, որ իսրայէլեան արտադրութիւնները նախապէս մեծապէս օգտակար եղած են իրեն։ Ինչպէս օրինակ, 2016-ին, Ազրպէյճան օգտագործած էր իսրայէլեան ժամանակակից անօդաչու թռչող սարքեր, որոնք հայկական կողմը դժուարութեան մատնած էին", ըսած է ազրպէյճանցի զինուորական փորձագէտ Ուզէյր Զաֆարով: Անոր համաձայն՝ իրենք զիրենք արդարացուցած են նաեւ «Սփայք» հակահրասայլային հրթիռները:
Փորձագէտին կարծիքով՝ Լիպերմանի այցելութեան ծիրին մէջ նոր որոշումներ որդեգրուած են զէնք-զինամթերքի գծով, սակայն, անոնց մասին կարելի պիտի ըլլայ իմանալ միայն այս տարեվերջին, երբ երկիրը ՄԱԿ-ի մէջ հաշուետւութիւն ներկայացնէ գնուած եւ վաճառուած զինուորական արտադրանքին մասին:
Ազրպէյճանական «Թրենտ» լրատու գործակալութիւնը իր կարգին կը հաղորդէ, թէ Պաքուի մէջ Ազրպէյճանի Պաշտպանութեան նախարար Զաքիր Հասանովի հետ իր հանդիպումէն ետք՝ Լիպերման բարձր գնահատած է երկու ժողովուրդներուն միջեւ պատմական կապերը եւ գոհունակութիւն յայտնած է երկիրներուն միջեւ ներկայ համագործակցութեան մակարդակին մասին, իսկ Հասանով ըսած է, թէ Ազրպէյճան կը փափաքի Իսրայէլէն յաւելեալ զէնքեր գնել, սակայն՝ չէ մանրամասնած։