Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (82) Յուլիս 2018

Այլազան

ՌՈՒՍԱՍՏԱՆ ՀԱՅԱՍՏԱՆԻՆantsoutarts1a


պիտի մատակարարէ Սու-30 ռազմական օդանաւեր Կարգ մը տեղեկութիւններու համաձայն՝ շուտով Հայաստան Ռուսաստանէն կրնայ ստանալ Սու-30 (Su-30) ժամանակակից կործանիչ ռազմական օդանաւեր, որոնք լուրջ յաղթաթուղթ կրնան ըլլալ Ազրպէյճանի դէմ հաւանական պատերազմի պարագային, կը տեղեկացնէ «Սփութնիք» լրատու գործակալութեան հայաստանեան գրասենեակը:
Հայաստանի վարչապետ Նիկոլ Փաշինեանի լուսանկարը՝ Սու-30 ՍՄ կործանիչի խցիկին մէջ, առիթ է ենթադրելու, որ շուտով այդ մարտական օդանաւերը կ՚առաքուին Հայաստան:
Նշենք, որ Յունիս 17-ին, Փաշինեան լուսանկարուած էր Սու-30 ՍՄ-ի խցիկին մէջ եւ զայն հրապարակած Դիմագիրքի իր էջին վրայ:
«Աշխարհի լաւագոյն կործանիչներէն մէկուն օդաչուի խցիկին մէջ եմ։ Արդէն Երեւան կը գտնուիմ», գրած էր վարչապետը: Լուսանկարը առնուած է Էրեբունի օդակայանին մէջ, ուր Հայաստանի վարչապետը ժամանած էր Արցախէն: Ռազմական օդանաւը, որ յայտնուած էր Փաշինեանի էջին մէջ, կը պատկանի ռուսական օդուժին, անիկա Հայաստան բերուած է կործանիչներու խումբի կազմին մէջ՝ ուսումնական թռիչքներու եւ հայ գործընկերներուն՝ կարելիութիւնները ցուցադրելու համար:
«Սփութնիք»-ի աղբիւրները, որոնք մօտ են Հայաստանի պաշտպանական գերատեսչութեան, կը յայտնեն, թէ Հայաստան Ռուսաստանի հետ բանակցութիւններ կը վարէ այդ ռազմական օդանաւերէն գնելու համար: Հայկական բանակը մէկ կամ մէկուկէս տարիէն կրնայ օժտուիլ այս կործանիչներով: Հայկական բանակը ներկայիս ունի Սու-25 գրոհային օդանաւեր, որոնք սակայն բաւական հինցած են:
Ըստ ռազմական փորձագէտ Լէոնիդ Ներսիսեանի՝ Սու-30-ի նման արդիւնաւէտ օդանաւերով բանակի օժտումը Հայաստանին թոյլ կու տայ ոչ միայն պարզապէս պատասխանել Ազէրպայճանին ՝ հաւանական մարտական գործողութիւններու ընթացքին, այլ նաեւ իր «խաղը» թելադրել օդին մէջ:
Ըստ Ներսիսեանի՝ այդ ռազմական օդանաւերը աժան չեն՝ նոյնիսկ անոր գինը զեղչելու պարագային։ Ռուսաստան զանոնք կը տրամադրէ ՀԱՊԿ (Հաւաքական անվտանգութեան մասին Պայմանագրի կազմակերպութիւն) երկիրներու շրջանակին մէջ: Ղազախստան նոյն ռազմական օդանաւին համար վճարած է շուրջ 22,5 միլիոն տոլար՝ առանց զէնքի, պահեստամասերու, առանց օդաչուներու վարժութեան եւ այլ ենթակառուցային ծախսերու: Ներսիսեան կ՚ենթադրէ, թէ մէկ ռազմօդանաւը իր ամբողջ ծրարով կ՚արժէ շուրջ 50 միլիոն տոլար: Ան նշած է, որ Սու-30-ի թռիչքը Ազրպէյճանի տարածքին դիւրին թռիչք չըլլար՝ նկատի ունենալով հարեւան պետութեան հակօդային բաւական հզօր համակարգը: Սակայն, գերճշգրիտ հրթիռներու օգնութեամբ կարելի է վնասազերծել հակառակորդի հակօդային համակարգերը:
Առաջին փուլին Հայաստան, հաւանաբար, գնէ 4-5 ռազմական օդանաւեր: