Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (115) Յուլիս 2021

Այլազան

Ռուս սահմանապահներ պիտի տեղակայուին Գեղարքունիքի սահմանը

antsoutarts1a
ԵՐԵՒԱՆ, «Արմէնփրէս», «Ազատութիւն».- Գեղարքունիքի մարզպետ Գնել Սանոսեան 7 Յուլիսին լրագրողներու հետ ունեցած զրոյցի մը ընթացքին յայտնեց, որ ռուս զինուժի մէկ մասը արդէն Գեղարքունիքի մարզին մէջ է. որոշ փուլէ մը ետք, անոնք պիտի տեղակայուին սահմանի երկայնքով։

Ռուս սահմանապահներու տեղակայումը, ըստ մարզպետին, օրերու հարց է: «Համատեղ գործընթաց է գնում, որի արդիւնքում ռուսական կողմի գործընկերները` զինուորականները, նրանց մի մասը արդէն մարզում են եւ որոշակի փուլից յետոյ արդէն նրանք կը տեղակայուեն սահմանի երկայնքով, հայ եւ արդբեջանական զինուած ուժերը դուրս կը բերուեն այդ հատուածներից, որից յետոյ մնացած բանակցային գործընթացը կը գնայ եւ որոշակի հատուածներում ճշգրտումներ կ՛արուեն», յայտնեց Սանոսեան:

Ան տեղեկացուց, որ բանակցութիւնները եռակողմանի են` Հայաստան-Ռուսիոյ-Ատրպէյճան ձեւաչափով:

Գեղարքունիքի մարզպետ Գնել Սանոսեան
Հայաստանի մօտ Ռուսիոյ դեսպան Սերգէյ Քոփիրքին եւս անդրադարձաւ այս հարցին եւ հաստատեց, որ հայ-ատրպէյճանական սահմանի խնդրայարոյց հատուածներուն մէջ ռուս սահմանապահներու ներկայութիւնը ընդլայնելու հարցին շուրջ առարկայական քննարկումները կը շարունակուին։ 7 Յուլիսին լրագրողներու հետ ունեցած զրոյցի մը ընթացքին, պատասխանելով այն հարցումին, թէ կա՞ն պայմանաւորուածութիւններ հայ-ատրպէյճանական սահմանի Սոթք-Խոզնավար հատուածէն Հայաստանի եւ Ատրպէյճանի զինուած ուժերու ստորաբաժանումները հեռացնելու եւ սահմանային լարուածութիւնը մեղմացնելու նպատակով հոն միջազգային դիտորդներ տեղակայելու մասին Հայաստանի վարչապետին առաջարկին վերաբերեալ՝ Քոփիրքին ըսաւ. «Նշուած հարցերուն շուրջ կ՛ընթանան առարկայական խորհրդակցութիւններ, այդ հարցերը կը քննարկուին, նաեւ՝ գործնական իմաստով: Երբ տրուին համապատասխան որոշումներ, մենք այդ մասին տեղեակ կը պահենք: Ինչպէս գիտէք` հայ-ատրպէյճանական սահմանի տարբեր հատուածներու մէջ տեղակայուած են ռուսական սահմանապահներու յենակէտեր, որոնք կը նպաստեն սահմանին իրավիճակը հանգիստ եւ կայուն ըլլալուն, իսկ աւելի կարեւորը այն է, որ տեղւոյն բնակչութիւնը աւելի յարմարաւէտ ու ապահով զգայ այս անսովոր իրավիճակին մէջ: Այո՛, քննարկումներ կ՛ընթանան այն հարցին շուրջ, թէ ինչպէ՛ս կարելի է ընդլայնել այդ ներկայութիւնը: Կը կարծեմ, թէ ամէն ինչ պիտի որոշուի Հայաստանի պահովութեան, սահմանին կայունութեան ապահովման եւ պայմանաւորուածութիւններու կատարման շահերու հիման վրայ, որոնք ձեռք բերուած են եռակողմանի ձեւաչափով»: