Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (95) Հոկտեմբեր 2019

Անցուդարձ

Իրանի Նախագահ Հասան Ռուհանի հանդիպումներ ունեցաւ Հայաստանի Նախագահին Եւ Վարչապետին հետ

Հայաստանի Հանրապետութեան նախագահ Արմէն Սարգսեան նախագահական նստավայրին մէջ ընդունեց Իրանի նախագահ Հասան Ռուհանին, որ եկած էր մասնակցելու Եւրասիական տնտեսական միութեան (ԵՏՄ) Բարձրագոյն տնտեսական խորհուրդի ընդլայնուած կազմով նիստին` հրաւիրեալ երկրի ղեկավարի կարգավիճակով:
Նախագահ Սարգսեան ըսաւ, թէ Իրան եւ Հայաստան միասին ապրած են հազարաւոր տարիներ, եւ երկու ժողովուրդները կրնան օրինակ ծառայել բարեկամական, եղբայրական յարաբերութիւններու` պատրաստակամութիւն յայտնելով ներդրում ունենալ անոնց ամրապնդման մէջ: Ան շեշտեց, որ Իրան-Հայաստան յարաբերութիւնները շատ աւելի մեծ ներուժ ունին, քան կարելի եղած է օգտագործել` աւելցնելով, որ Հայաստանի Հանրապետութեան նախագահի աշխատակազմը պատրաստ է այս ուղղութեամբ տարբեր աշխատանքներու ծաւալելու:
Իրանի նախագահը իր կարգին անդրադարձաւ դարերէ եկող շատ սերտ ու մտերիմ յարաբերութիւններուն: Ըստ անոր, Եւրասիական տնտեսական միութիւնը պիտի սերտէ այդ համագործակցութիւնը, որպէսզի աւելի ուշ կարելի ըլլայ զանոնք գործնականացնել եւ առաւելագոյնս օգտուիլ անկէ, յատկապէս առեւտրատնտեսական բնագաւառին մէջ: Հ. Ռուհանի յոյս յայտնեց, որ երեւանեան համաժողովը պիտի նպաստէ ո՛չ միայն ԵՏՄ-ի անդամ երկիրներուն հետ համագործակցութեան, այլ նաեւ Հայաստանի հետ յարաբերութիւնները աւելի աշխուժացնելու:
Հանդիպման ընթացքին միտքեր փոխանակուեցան հայ-իրանական օրակարգի եւ երկու երկիրներու միջեւ յարաբերութիւններուն վերաբերող տարբեր հարցերու շուրջ` շեշտելով, որ անոնք պէտք է առաւել եւս աշխուժացուին, եւ առաւելագոյնս օգտագործուին բոլոր կարելիութիւնները: Նշուեցաւ, որ ազատ մուտքի արտօնագիրի դրութիւնը պիտի նպաստէ երկկողմանի յարաբերութիւններուն եւ զբօսաշրջութեան զարգացման: Առեւտրական-տնտեսական կապերու զարգացման առումով նախագահները կարեւոր նկատեցին ազատ տնտեսական գօտիներու արդիւնաւէտ աշխատանքը:
Նշելով, որ Հայաստան ունի մաքուր ուժանիւթի մեծ ներուժ` նախագահ Սարգսեան ըսաւ, թէ այս ոլորտին մէջ համագործակցութիւնը կարելի է աւելի եւս ընդլայնել եւ առաջարկեց աւելի մեծ ուշադրութիւն դարձնել այս ուղղութիւններուն, յատկապէս այն առումով, որ Իրան արեւային ուժանիւթի բնագաւառին մէջ մեծ յաջողութիւններ ունի: Անդրադառնալով երթեւեկի ոլորտին` Հայաստանի նախագահը նշեց, որ Հայաստանը Իրանին կապող մայրուղին ժամանակակից դարձնելով` մեծապէս պիտի աւելնան փոխադրումները:
Զրուցակիցները մեծագոյն դրուատիքով խօսեցան իրանահայ համայնքին մասին` ընդգծելով անոր մեծ դերակատարութիւնը երկկողմանի միջպետական յարաբերութիւններու ամրապնդման մէջ:
Նոյն ծիրին մէջ, Իրանի նախագահ Հասան Ռուհանի հանդիպում ունեցաւ Հայաստանի վարչապետ Նիկոլ Փաշինեանի հետ:
Հասան Ռոհանիի հետ հանդիպումին քննարկուեցան հայ-իրանական յարաբերութիւններու օրակարգային շարք մը հարցեր: Փաշինեան անդրադարձաւ երկու երկիրներուն միջեւ յարաբերութիւններուն դրական ըլլալուն եւ այդպէս շարունակուելուն` ըսելով. «Մեր դիրքորոշումը այն է, որ Իրանի հետ մեր յարաբերութիւնները պէտք է ըստ կարելւոյն դուրս ըլլան աշխարհաքաղաքական ազդեցութիւններէ, որովհետեւ մենք անմիջական դրացիներ ենք եւ ունինք շատ ընդհանուր շահեր, եւ մենք դեռ շատ երկար դարեր եւ հազարամեակներ պէտք է համագործակցինք»:
Փաշինեան նաեւ հաստատեց, որ Հայաստան բարձր կը գնահատէ Իրանի հաւասարակշռուած դիրքորոշումը` Լեռնային Ղարաբաղի տագնապի խաղաղ լուծման հարցին մէջ: Իր կարգին, Հասան Ռուհանի կարեւոր նկատեց տագնապի լուծումը խաղաղ բանակցութիւններու միջոցով` հաշուի առնելով հակամարտող բոլոր կողմերուն դիրքորոշումներն ու կարծիքները:
Երկուստեք կարեւոր նկատեցին պարբերաբար գումարուող երկկողմանի միջկառավարական յանձնախումբի նիստերու գործունէութիւնը, որուն իբրեւ արդիւնք ձեռք բերուած են տնտեսական կապերու զարգացման միտուած պայմանաւորուածութիւններ:
Նախագահ Հասան Ռուհանի շատ կարեւոր նկատեց Հայաստանի հետ բոլոր ոլորտներուն մէջ յարաբերութիւններու զարգացումը եւ ընդլայնումը` իբրեւ բարեկամ եւ դրացի երկիր: