Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (87) Յունուար 2019

Անցուդարձ

Նորընտիր Ազգային Ժողովի պատգամաւորները հանդիսաւոր արարողութեամբ ստացան պատգամաւորական իրաւագիրները

Պատգամաւորական իրաւագիրները պատգամաւորներուն յանձնուած են, նորընտիր` 7-րդ գումարման Ազգային ժողովի առաջին նիստի օրը յայտարարուած` անիկա տեղի պիտի ունենայ յառաջիկայ երկուշաբթի` 14 յունուարին:
Այս անգամ ոչ թէ Կեդրոնական ընտրական յանձնախումբի նախագահը յանձնեց պատգամաւորական իրաւագիրները, այլ ընտրողները: Իւրաքանչիւր ընտրական տարածքէն ընտրուած էին երկու հոգի, անոնց կարգին` 103-ամեայ Բաւական Փիլոյեանն ու 99-ամեայ Խաչիկ Գաբրիէլեանը, նաեւ` այս դեկտեմբերին առաջին անգամ ընտրութիւններուն մասնակցած երկու երիտասարդներ:
Պատգամաւորական իրաւագիրը ստանալու չէր եկած Բարգաւաճ Հայաստան կուսակցութեան ղեկավար Գագիկ Ծառուկեան:
7-րդ գումարման խորհրդարանը արդէն 132 պատգամաւոր ունի: Շատ են երիտասարդները, նաեւ` կիները: Պակսած է խմբակցութիւններու թիւը` չորսի փոխարէն երեք ուժեր ներկայացուած են: 88 տեղերը` կայուն մեծամասնութիւնը «Իմ քայլը» դաշինքինն է: Երկրորդ խմբակցութիւնը` Բարգաւաճ Հայաստան կուսակցութիւնը` 26 պատգամաւորական իրաւագիր, երրորդը` 18, Լուսաւոր Հայաստան:
Վերջին երկու ուժերը յայտարարած են, որ ընդդիմադիր պիտի ըլլան:
Խորհրդարանի առաջին նստաշրջանի օրակարգային հարցերէն պիտի ըլլայ նաեւ օրէնսդիրի ղեկավարութեան ընտրութիւնը: «Իմ քայլը» արդէն յայտարարած է, թէ Ազգային ժողովի նախագահի իրենց թեկնածուն առաջին փոխվարչապետի պաշտօնակատար Արարատ Միրզոյեանն է, երկու փոխնախագահները` պատգամաւորներ Լենա Նազարեանն ու Ալեն Սիմոնեանը:
Բարգաւաճ Հայաստան կուսակցութիւնը չէ յստակացուցած խմբակցութեան ղեկավարի եւ քարտուղարի անունները: Իսկ «Իմ քայլը» եւ Լուսաւոր Հայաստանը խմբակցութիւնները կողմնորոշուած են. իշխանական խմբակցութիւնը պիտի ղեկավարէ Լիլիթ Մակունցը, քարտուղարը պիտի ըլլայ Յակոբ Սիմիդեանը, իսկ ընդդիմադիր Լուսաւոր Հայաստանինը` Էտմոն Մարուքեանն ու Գէորգ Գորգիսեանը: