Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (87) Յունուար 2019

Անցուդարձ

ՆԻԿՈԼ ՓԱՇԻՆԵԱՆ. «2019 թուականը պէտք է դառնայ անհատական ջանքի յաղթանակի տարի, մտքի ու աշխատանքի համադրման տարի»

Վարչապետի պաշտօնակատար Նիկոլ Փաշինեանը շնորհաւորական ուղերձ յղած է Ամանորի առիթով:
Վարչապետի պաշտօնակատարի ուղերձին մէջ նշուած է.
«Սիրելի՛ ժողովուրդ, Հայաստանի Հանրապետութեան հպարտ քաղաքացիներ, Արցախի Հանրապետութեան հպարտ քաղաքացիներ, սփիւռքի հպարտ հայութիւն.
Ահա եւ անցաւ 2018 թուականը: Սա մի տարի էր, որ մնալու է համաշխարհային եւ հայ ժողովրդի պատմութեան մէջ, իւրաքանչիւր հայի յիշողութեան մէջ` որպէս ժողովրդի իշխանութեան հաստատման, քաղաքացիական արժանապատուութեան, լաւատեսութեան ու պետականութեան յաղթանակի տարի:
2018-ը մի տարի էր, երբ հայաստանաբնակ թէ սփիւռքահայ, մեծ ու մանուկ, կին թէ տղամարդ, գիւղաբնակ թէ քաղաքաբնակ` միաւորուեցին մէկ ընդհանուր նպատակի շուրջ եւ կերտեցին մէկ ընդհանուր յաղթանակ, որն ի վերջոյ դարձաւ ազգային միասնութեան մի բացառիկ նուաճում:
2018-2019 թուականների այս սահմանագծին ուզում եմ ձեւակերպել, ուրեմն, այն խնդիրը, որ դրուած է մեր առաջ. 2019 թուականը դարձնել նոյնքան սիրելի ու հարազատ, նոյնքան յիշարժան եւ յաղթառատ, որքան եղաւ 2018 թուականը:
Եւ հարկ եմ համարում արձանագրել, որ անցնող տարին ոչ թէ մեր յաղթանակների գագաթն էր, այլ ընդամէնը ստորոտը, ոչ թէ մեր երթի եզրագիծն էր, այլ ընդամէնը մեկնարկը:
2019 թուականին մենք պէտք է նուաճենք նոր բարձունքներ, արձանագրենք նոր յաջողութիւններ եւ առաջին հերթին մեր երկրի ընկերային-տնտեսական կեանքում:
2019 թուականի մեր հիմնական խնդիրը տնտեսական յեղափոխութիւնն է, նրա արդիւնքներն աւելի ու աւելի տեսանելի դարձնելը: Բայց եկող տարին նոյնպէս մեր յաղթանակների գագաթնակէտը չի լինելու, ոչ թէ այն պատճառով, որ մեր թռիչքը ցածր է լինելու, այլ այն պատճառով, որ մեր ազգային եւ պետական յաւակնութիւնները լինելու են բարձր, աւելի բարձր, աւելի ու աւելի բարձր:
Սրանում է Հայաստանում տեղի ունեցած ոչ բռնի, թաւշեայ, ժողովրդական յեղափոխութեան առանցքային իմաստը: Երբ ժողովուրդը հաւատում է իր միասնութեան ուժին, իր անցեալի եւ ապագայի ուժին: Մենք հաւատում ենք մեր ամէն քաղաքացու ստեղծարար տաղանդին, եւ 2019 թուականը պիտի դառնայ հէնց ստեղծարար տաղանդի յաղթանակի տարի, երբ ամէն անհատ, Հայաստանի Հանրապետութեան ամէն քաղաքացի, Հայաստան ներգաղթած ամէն մի հայ իրեն տեսնում է ոչ թէ սպառողի, այլ արարողի դերում, ոչ թէ հետեւորդի, այլ առաջնորդի դերում, ոչ թէ հարկ թաքցնողի, այլ հարկ վճարողի դերում, ոչ թէ գործազուրկի, այլ աշխատողի դերում, ոչ թէ աղքատի, այլ աղքատութեանը յաղթողի, աղքատութեան հետ չհաշտուողի, աղքատութիւնը ստեղծարար մտքով, արդար աշխատանքով յաղթահարողի դերում:
2019 թուականը պէտք է դառնայ անհատական ջանքի յաղթանակի տարի, մտքի ու աշխատանքի համադրման տարի: Եւ ուրեմն, ամանորեայ այս օրերին մեր տրամադրութիւնը պէտք է նոր ուժով ու եռանդով լիցքաւորի բոլորիս, նոր լաւատեսութեամբ եւ սիրով համակի մեր հայրենիքն ու ժողովրդին:
Սիրելի՛ հայրենակիցներ,
Ամանորեայ այս երեկոյին ուզում եմ առանձնայատուկ ողջոյններ յղել առաջնագծում եւ սահմանին կանգնած մեր բոլոր զինուորներին, սպաներին, զօրավարներին, ովքեր աչալուրջ հսկում են մեր ամանորեայ անդորրը:
Ողջունում եմ Հայաստանի ոստիկանութեան, ազգային անվտանգութեան ծառայութեան, արտակարգ իրավիճակների, արդարադատութեան նախարարութեան այն ծառայողներին, ովքեր ամանորեայ այս րոպէներին իրենց ծառայական պարտականութիւններն են կատարում` ապահովելով մեր ժողովրդի անվտանգութիւնը:
Ողջունում եմ մեր այն բուժաշխատողներին, ուժանիւթի, հեռահաղորդակցութեան, փոխադրութեան ոլորտի այն աշխատողներին, եւ ընդհանրապէս բոլոր այն մարդկանց, ովքեր Ամանորը դիմաւորում են աշխատանքային պարտականութիւնները կատարելիս:
Եւ ի վերջոյ ողջունում եմ Հայաստանի Հանրապետութեան բոլոր քաղաքացիներին, մեր բոլոր հայրենակիցներին` Հայաստանում, Արցախում եւ սփիւռքում:
Սիրում եմ բոլորիդ, հպարտանում եմ բոլորովդ եւ խոնարհւում եմ բոլորիդ առաջ:
ժպտացէ՛ք իրար, սիրելի՛ հայրենակիցներ, որովհետեւ Նոր տարին, ահա, եկաւ:
Շնորհաւոր Ամանոր եւ Սուրբ Ծնունդ:
Եւ ուրեմն` կեցցէ՛ Ազատութիւնը, կեցցէ՛ Հայաստանի Հանրապետութիւնը, կեցցե՛նք մենք եւ մեր երեխաները, որ ապրում ենք եւ ապրելու ենք ազատ եւ երջանիկ Հայաստանում»: