Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (84) Հոկտեմբեր 2018

Անցուդարձ

Ազգային Ժողովի Կանոնակարգ Օրէնքին մէջ կատարուած փոփոխութիւնը կ՛արժանանայ Փաշինեանի սուր հակազդեցութեան.

2 Հոկտեմբեր 2018-ին, կէսօրէ ետք, Հայաստանի Ազգային ժողովի արտակարգ նիստ գումարուեցաւ: Հայաստանի Ազգային ժողովի պատգամաւորներ Արփինէ Յովհաննիսեանն ու Գէորգ Պետրոսեանը առաջարկեցին «Ազգային ժողովի կանոնակարգ օրէնք»-ի 50-րդ յօդուածին մէջ կատարել լրացում, ըստ որուն` եթէ պատգամաւորները չեն կրցած գալ նիստի, ապա նախագահողը նիստը կրնայ նկատել ընդհատուած: Այսինքն, եթէ մինչ այս` վարչապետը հրաժարական տար ու ինչ-ինչ պատճառներով խորհրդարանի նիստը 2 շաբաթ չկայանար, ապա խորհրդարանը իրաւունքի ուժով պէտք է լուծարուէր: Այս լրացումէն ետք նիստի չկայանալու պարագային նախագահողը կրնայ յայտարարել, որ նիստը յետաձգուած է (ոչ թէ` չկայացած): Ըստ այդմ` կը վերանայ Ազգային ժողովի ինքնալուծարման կարելիութիւնը:
Տեղի ունեցած արտակարգ նիստին, 67 կողմ ձայնով ընդունուած է Ազգային ժողովի կանոնակարգ-օրէնքին մէջ փոփոխութիւններ կատարելու մասին օրէնքի նախագիծը: Ազգային ժողովի յարկին տակ` լրագրողներու հետ զրոյցի մը ընթացքին` այս մասին յայտնած է Հայաստանի Հանրապետութեան Ազգային ժողովի փոխնախագահ Էդուարդ Շարմազանով: «Օրէնքը ընդունուեցաւ 67 կողմ ձայնով», ըստ «Արմէնփրես»-ի` ըսած է Շարմազանով: Ան ընդգծած է, որ քուէարկութիւնը քարտերով չէ իրականացած, այլ` ձեռքով:
Ազգային ժողովի Հանրապետական կուսակցութեան (ՀՀԿ) խմբակցութեան պատգամաւոր Արմէն Աշոտեան, իր կարգին, յայտնած է, որ նախագիծին կողմ քուէարկած են ՀՀԿ-ն, ԲՀԿ-ն եւ ՀՅԴ-ն:
Այն հարցին, թէ ինչո՞ւ սրած են իրավիճակը, Շարմազանով ընդգծած է, որ իրենք իրավիճակ չեն սրած` շեշտելով, որ այդ նախագիծը արտահերթ ընտրութիւններուն դէմ չէ: «Ասիկա անոր համար էր, որ Ազգային ժողովը կարենայ իր սահմանադրական լիազօրութիւնները կատարել», ըսած է Ազգային ժողովի փոխնախագահը:
Ընթացքին Հայաստանի վարչապետ Նիկոլ Փաշինեան ֆէյսպուքեան ուղիղ եթերով հասարակութեան կոչ ուղղեց հաւաքուելու Ազգային ժողովին մօտ` ըսելով, որ Գիտութիւններու ազգային ակադեմիային դիմաց ելոյթ պիտի ունենայ:
Այնուհետեւ Երեւանի Բաղրամեան պողոտային վրայ` Հայաստանի Գիտութիւններու ազգային ակադեմիայի շէնքի հարթակին մօտ` տեղի ունեցաւ Հայաստանի վարչապետ Նիկոլ Փաշինեանի հրաւիրած հանրահաւաքը:
«Արմէնփրես» տեղեկացուցած է, որ վարչապետը միացած է քաղաքացիներուն, որոնք վանկարկեցին «արտահերթ, արտահերթ»` պահանջելով արտահերթ խորհրդարանական ընտրութիւններու իրականացում:
«Հայաստանի Հանրապետական կուսակցութիւնը եւ անոր աջակցած ուժերը, որոնք այդ նախագիծը դրած են շրջանառութեան մէջ ու քուէարկած, Հայաստանի մէջ պաշտօնապէս յայտարարած են հակայեղափոխութիւն: Բայց բոլորս կը տեսնենք, որ ատիկա պիտի չիրականանայ, հակայեղափոխութիւնը Հայաստանի մէջ տեղ չունի, որովհետեւ ժողովուրդը յաղթած է, եւ այդ յաղթանակը ոչ ոք կրնայ խլել:
«ՀՀԿ-ն պէտք է արմատախիլ ըլլայ Հայաստանի քաղաքական դաշտէն: Հայաստանի քաղաքական դաշտէն պէտք է արմատախիլ ըլլան նաեւ այն քաղաքական ուժերը, որոնք աջակցած են հակայեղափոխութեան», իր խօսքին մէջ ըսած է Հայաստանի վարչապետ Նիկոլ Փաշինեան:
Համբարձումեան. «ՀՅ Դաշնակցութիւնը Իր Ներկայացուցիչները
Ետ Կը Կանչէ Հայաստանի Կառավարութենէն»
Մինչ այդ, վարչապետ Փաշինեանի յայտարարութիւններէն առաջ ՀՅԴ Հայաստանի Գերագոյն մարմինի ներկայացուցիչ Արսէն Համբարձումեան, «Երկիր» կայքին հետ զրոյցի մը ընթացքին յայտարարեց, որ հաշուի առնելով ներկայիս լարուած եւ ջրբաժաններ գծելու մթնոլորտը` ՀՅ Դաշնակցութիւնը իր ներկայացուցիչները ետ կը կանչէ Հայաստանի կառավարութենէն` աւելցնելով, որ աւելի ուշ ՀՅԴ Հայաստանի Գերագոյն մարմինը հանդէս պիտի գայ հանգամանալից պարզաբանումներով ու յայտարարութեամբ:
Աւելի ուշ, ըստ «Արմէնփրես»-ի, Բաղրամեան պողոտային վրայ հանրահաւաքի ընթացքին Հայաստանի Հանրապետութեան վարչապետ Նիկոլ Փաշինեան իր աշխատակազմին հրահանգած է պատրաստել ՀՅԴ-ն ու ԲՀԿ-ն ներկայացնող նախարարները աշխատանքէ ազատ կացուցելու մասին որոշում` տեղւոյն վրայ ստորագրելով այդ կուսակցութիւնները ներկայացնող նախարարներու եւ մարզպետներու աշխատանքէ հեռացման որոշումները:
«Այսօր մենք պէտք է խօսինք Հայաստանի մէջ ստեղծուած նոր քաղաքական իրավիճակին եւ անոր լուծումներուն մասին: Երէկ եւ այսօր, հապճեպ կերպով Հանրապետական, Ծառուկեան դաշինքի եւ ՀՅԴ-ի պատգամաւորներուն կողմէ ներկայացուած է խայտառակ օրինագիծ մը, որուն նպատակը շատ յստակ Հայաստանի մէջ հակայեղափոխութիւն իրականացնելն է, այսինքն, արտահերթ խորհրդարանական ընտրութիւններու ճամբան փակելը: Եւ, այո՛, այդ նախագիծին ընդունումը դաւադրութիւն է Հայաստանի բարձրագոյն իշխանութեան, այսինքն` հայ ժողովուրդին նկատմամբ: Եւ ես, այդ որոշումին մասին գիտնալով, իմ աշխատակազմիս հրահանգած եմ պատրաստել ստորագրման որոշում ՀՅԴ-ն ու «Ծառուկեան» դաշինքը ներկայացնող նախարարները աշխատանքէ հեռացնելու մասին: ՀՅԴ-ն ու ԲՀԿ-ն ներկայացնող նախարարներն ու մարզպետները աշխատանքէ կը հեռացուին: Եւ անոնք, ըստ էութեան, այս պահուն կը նկատուին հեռացուած», յայտարարած է Հայաստանի վարչապետը:
Կէս գիշերէն ետք հաղորդուեցաւ, որ նախագահ Արմէն Սարգսեան ստորագրած է ՀՅԴ-ի եւ ԲՀԿ-ի նախարարները իրենց պաշտօններէն ազատ կացուցելու հրամանագիրները:
ՀՅԴ–ական Նախարարները Կուսակցական Ղեկավար Մարմինէ՛ն
Տեղեկացած Են, Որ Զիրենք Ետ Կը Կանչեն Կառավարութենէն
Տնտեսական զարգացման եւ ներդրումներու նախարար Արծուիկ Մինասեան պատասխանելով «Երկիր Մետիա»-ի հարցումին, թէ արդեօք անոր կառավարութեան աշխատակազմէն յայտնա՞ծ են` աշխատանքէ դուրս գալու դիմում գրելու մասին, ինչպէս հանրահաւաքին յայտարարած է վարչապետ Փաշինեան, յայտնեց, թէ նման հեռաձայնային հաղորդակցութիւն չէ եղած:
Միակ հեռաձայնային հաղորդակցութիւնը կատարուած է ՀՅԴ Հայաստանի Գերագոյն մարմինի կողմէ: Կուսակցական ղեկավար մարմինէն յայտնած են, որ իրենք ետ կը կանչեն կառավարութեան դաշնակցական անդամները, եւ պէտք է հրաժարականի դիմում ներկայացնել: Նոյնը պատասխանած է նաեւ գիւղատնտեսութեան նախարար Արթուր Խաչատրեան:
Փաշինեան Ազգային Ժողովի Նախաձեռնութեան Հակազդելու
Իր Մարտավարութիւնը Կը Յայտարարէ
Ազգային ժողովի արտակարգ նիստով խորհրդարանի կանոնակարգ օրէնքին մէջ փոփոխութիւն մտցնելու ՀՀԿ-ի նախաձեռնած քուէարկութենէն ետք Ազգային ժողովի շէնքը շրջապատող բազմութեան առջեւ իր ելոյթին ընթացքին, վարչապետ Փաշինեան հրապարակեց նոր վիճակը դիմագրաւելու իր մարտավարութիւնը:
Փաշինեան նախ կոչ ուղղեց Հայաստանի նախագահին, որ չստորագրէ Ազգային ժողովի որոշումը: Նախագահը կրնայ նաեւ որոշումը յղել Սահմանադրական դատարան` անոր օրինականութիւնը քննելու համար:
Հրապարակաւ «Բարգաւաճ Հայաստան»-ի եւ ՀՅԴ-ի նախարարներն ու մարզպետները պաշտօնէ հեռացնելու իր որոշումը ստորագրելով` Փաշինեան յայտարարեց, որ երբ օրինականանայ նախարարներու եւ մարզպետներու պաշտօնանկութիւնը, ինք պիտի հրաժարի եւ ըստ սահմանադրութեան, Ազգային ժողովը պէտք է ընտրէ նոր վարչապետ:
Փաշինեան յայտնեց, որ ինք վստահ է, որ ժողովուրդը թոյլ պիտի չտայ, որ Ազգային ժողովը իրմէ զատ ուրիշ վարչապետ ընտրէ, հետեւաբար ստիպուած պիտի ըլլայ լուծարուելու, որմէ ետք, այս տարուան նոյեմբերի վերջաւորութեան կամ դեկտեմբերի սկիզբը տեղի պիտի ունենան արտահերթ խորհրդարանական ընտրութիւններ:
Նշեալ յայտարարութիւնը կատարելէ ետք վարչապետը մտաւ Ազգային ժողովի շէնք` բանակցութիւններ վարելու տակաւին շէնքին մէջ գտնուող պատգամաւորներուն հետ:
Փաշինեան ցուցարարներուն յորդորեց որեւէ ձեւով չխոչընդոտել պատգամաւորներու շարժումները եւ թոյլ տալ անոնց մեկնիլ Ազգային ժողովի շէնքէն:
Մարդու Իրաւունքներու Պաշտպանը Կոչ Կ՛ուղղէ
Ցուցաբերելու Առաւելագոյն Հանդուրժողականութիւն
Երէկ Հայաստանի Հանրապետութեան մարդու իրաւունքներու պաշտպանը տարածած է հաղորդագրութիւն մը, որուն մէջ նշուած է. «Մարդու իրաւունքներու պաշտպանի աշխատակազմը կ՛իրականացնէ Երեւանի եւ Հայաստանի շարք մը մարզերուն մէջ տեղի ունեցող հաւաքներու դիտարկումը:
Այս պահուն հաւաքներու բոլոր մասնակիցներէն կը խնդրեմ ցուցաբերել առաւելագոյն հանդուրժողականութիւն եւ զսպուածութիւն, որեւէ իրավիճակի պարագային զերծ մնալ որեւէ տեսակի բռնութենէ:
Ըստ իրադարձութիւններու եւ անոնց դիտարկման ընթացքին` մարդու իրաւունքներրու պաշտպանը հանդէս պիտի գայ անհրաժեշտ յայտարարութիւններով:
Բոլոր հարցերը պէտք է լուծուին իրաւունքի գերակայութեան հիման վրայ»:
Փաշինեան Ազգային Ժողովի Նախագահի Աշխատասենեակին Մէջ
Բանակցած Է Խորհրդարանական Խմբակցութիւններու Ներկայացուցիչներուն Հետ
Հայաստանի Հանրապետութեան վարչապետ Նիկոլ Փաշինեան երէկ Ազգային ժողովի նախագահ Արա Բաբլոյեանի աշխատասենեակին մէջ բանակցութիւններ վարած է խորհրդարանական խմբակցութիւններու ներկայացուցիչներուն հետ:
Այս մասին Ազգային ժողովէն յայտնած է «Արմէնփրես»-ի թղթակիցը:
Հայաստանի Ազգային ժողովի նախագահի աշխատասենեակին մէջ էին խորհրդարանական ՀՀԿ, «Ծառուկեան», «Ելք» եւ ՀՅԴ խմբակցութիւններու ներկայացուցիչները: Քննարկումներ տեղի ունեցած են ստեղծուած իրավիճակը հանգուցալուծելու ուղղութեամբ:
Մինչ այդ, Ազգային ժողովի միջանցքին մէջ լրագրողներուն հետ զրոյցի մը ընթացքին վարչապետ Նիկոլ Փաշինեան ըսաւ, թէ ստեղծուած իրավիճակէն դուրս գալու ճամբան կը պատկերացնէ արտահերթ ընտրութիւններու մասին համաձայնութիւն ձեռք բերելու ճամբով: «Կը պատկերացնեմ, որ մենք համաձայնութեան կը հասնինք, որ արտահերթ ընտրութիւններ պիտի ըլլան, ես հրաժարական պիտի տամ, իսկ իրենք թեկնածու պիտի չառաջադրեն», ընդգծեց Փաշինեան: