Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (82) Յուլիս 2018

Անցուդարձ

Ձերբակալուեցաւ Հայաստան Համահայկական Հիմնադրամի տնօրէն Արա Վարդանեան


ԵՐԵՒԱՆ, «Արմէնփրէս».- Հայաստանի Հանրապետութեան Ազգային անվտանգութեան ծառայութեան (ԱԱԾ) ստացած տուեալներուն հիման վրայ՝ Երկուշաբթի, 2 Յուլիսին, իւրացումներ կատարելու, ինչպէս նաեւ հասարակական կազմակերպութեան ծառայողի իր լիազօրութիւնները չարաշահելու կասկածով ձերբակալուեցաւ Հայաստան Համահայկական հիմնադրամի տնօրէն Արա Վարդանեան:
ԱԱԾ մամլոյ կեդրոնը կը հաղորդէ, որ փաստացի հանգամանքներու ճնշումին տակ, Վարդանեան խոստովանեցաւ, որ տնօրինելով հիմնադրամին տրամադրուած 25 միլիոն դրամի վարկային գծով դրամատնային քարտը՝ անոր միջոցները օգտագործած է անձնական նպատակներով: Գումարներուն մէկ մասը տարբեր առցանց խաղատուներու խաղադրոյքներ կատարելու ուղղուած է:
Ըստ անոր՝ վարկային քարտէն վատնած միջոցները Վարդանեան վերադարձուցած է հիմնադրամին հանգանակուած գումարներու հաշիւին: «Այնուհետ՝ անձնական միջոցները կանխիկ մուտքագրել է հիմնադրամի հաշուապահութիւն, դրանով իսկ թաքցնելով հիմնադրամի գումարների վատնման հանգամանքը», կը յայտնէ ԱԱԾի հաղորդագրութիւնը՝ աւելցնելով, որ «Միայն վերջին շաբաթուայ ընթացքում Վարդանեանը հիմնադրամի բանկային քարտից մօտ 14 միլիոն ՀՀ դրամ է փոխանցել օնլայն խաղատներին, իսկ 2016ից 2018 թուականներն ընկած ժամանակահատուածում այդ գումարը կազմել է շուրջ 130 միլիոն ՀՀ դրամ»:
Այս պահուն Հայաստան համահայկական հիմնադրամին հաշիւները կը ստուգուին՝ հնարաւոր չարաշահումներն ու իւրացումները բացայայտելու, ինչպէս նաեւ հանգանակուած գումարներու ծախսերու օրինականութիւնը ճշդելու ուղղութեամբ: Նախաքննութիւնը կը շարունակուի:
Արա Վարդանեան նախագահ Արմէն Սարգսեանին ներկայացուցած է
իր հրաժարականի դիմումը
«Հայաստան» համահայկական հիմնադրամի նախագահ Արա Վարդանեան ՀՀ նախագահ Արմէն Սարգսեանին ներկայացուցած է իր հրաժարականի դիմումը:
Յուլիս 9-ին ՀՀ նախագահ Արմէն Սարգսեան ընդուներ է Վարդանեանը, որ ներկայացուցած է իր հրաժարականը՝ իր դէմ յարուցուցած՝ պաշտօնական դիրքը չարաշահելու մեղադրանքին պատճառով:
Նախագահ Արմէն Սարգսեան, որպէս Հիմնադրամի Հոգաբարձուներու խորհուրդի նախագահ, ի գիտութիւն ընդունած է Արա Վարդանեանի հրաժարականի դիմումը:
Սակայն, ըստ սահմանուած կարգի՝ դիմումը պէտք է ղրկուի Հոգաբարձուներու խորհուրդի անդամներուն՝ հաստատման համար, որմէ յետոյ պէտք է ստեղծուի յատուկ յանձնաժողով, որ մրցումով կ՚ընտրէ Հիմնադրամի նոր գործադիր տնօրէն: