Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (74) Նոյեմբեր 2017

Անցուդարձ

ԵՐՈՒՍԱՂԷՄ

Ազնաւուր Իսրայէլի նախագահին հարց տուած է, թէ ե՞րբ իր երկիրը վերջապէս պիտի ճանչնայ հայոց ցեղասպանութիւնը

antsoutarts1aՀոկտեմբեր 26-ին Իսրայէլի նախագահի նստավայրին մէջ տեղի ունեցած է Շառլ Ազնաւուրի եւ անոր ընկերացող ընտանիքի անդամներու հանդիպումը նախագահ Ռուվեն Ռիվլինի ու «Ռաուլ Վալենպերկ» միջազգային հիմնադրամի ղեկավարութեան հետ:
Հիմնադրամի նախագահ Պարուխ Թենենպաում շուէտացի դիւանագէտ Ռաուլ Վալենպերկի անունը կրող մետալով պարգեւատրած է Շառլ Ազնաւուրը, ինչպէս նաեւ անոր քոյրը` Այտան, որուն փոխարէն պարգեւը ստացած է Ազնաւուրի տղան` Նիքոլա:
Հիմնադրամի ներկայացուցիչները այս ձեռնարկին բացումը կատարած են ներկայացնելով հրեայ փրոֆէսէօր, ցեղասպանագէտ, հայ ժողովուրդի բարեկամ Եաիր Օրոնի տարի մը տեւած աշխատանքը, որու ընթացքին ան գրի առած է Ազնաւուրի ընտանիքի պատմութիւնը, Շառլ Ազնաւուրի ծնողներու` Միշայի ու Քնարի, ինչպէս նաեւ քրոջ սխրանքները Երկրորդ աշխարհամարտի տարիներուն:
Ազնաւուր իր խորին երախտագիտութիւնը յայտնած է թէ՛ «Վալենպերկ» հիմնադրամին` պարգեւին համար, թէ՛ ալ Իսրայէլի նախագահին` ընդունելութեան համար: Այնուհետեւ հարցուցած է, թէ ե՞րբ Իսրայէլ վերջապէս պիտի ճանչնայ Հայոց ցեղասպանութիւնը:
"Ես Ձեզի պիտի յղեմ հարցում մը, որուն չեմ սպասեր պատասխան. այնուամենայնիւ, կարեւոր է զայն բարձրացնել։ Ինչո՞ւ Դուք չէք ճանչնար Հայոց ցեղասպանութիւնը, մինչ Ձեր ազգը ի՛նք տառապած է նացիական վարչակարգէն", հարց տուած է Ազնաւուր:
Ի պատասխան` Ռիվլին ըսած է, որ ատիկա քաղաքական հարց է, եւ իր` Քնեսէթի երեսփոխան ու այնուհետեւ նաեւ նախագահ եղած տարիներուն այս հարցը ամէն տարի արծարծուած է Իսրայէլի խորհրդարանին մէջ, յիշատակած են Հայոց ցեղասպանութեան օրը, եւ ինք ալ 2015-ին ՄԱԿ-ի ամպիոնէն բաւական յստակ կերպով արտայայտուած է 1915-ին տեղի ունեցած Հայոց ցեղասպանութեան մասին:
Յաջորդ օր, կէսօրին, Նեւէ Շալոմ գիւղին մէջ, որու բնակչութիւնը կը բաղկանայ թէ՛ հրեաներէ եւ թէ արաբներէ, Ազնաւուր ձիթենի տնկած է ի պատիւ հրեաներու, քրիստոնեաներու ու մահմետականներու կեանքը փրկած հերոսներու: