Ազատ Խօսք - Ելեկտրոնային Անկախ Պարբերաթերթ

կայք էջ : www.azadkhosk.com

Խմբագիր - Երան Գույումճեան

Թիւ (102) Մայիս 2020

Անցուդարձ

Լաւրովի համաձայն՝ բանակցութեան սեղան բերուած է փուլային տարբերակ:

« Փուլային տարբերակը քննարկուած է 2014 եւ 2016 թուականներուն, եւ ան անընդունելի է հայկական կողմին համար» Զոհրապ Մնացականեան:

Արցախեան բանակցութիւններու սեղան բերուած են փաստաթուղթեր, որոնցմով կ՚առաջարկուի հակամարտութեան փուլային կարգաւորում:
Այս մասին Ապրիլ 21-ին յայտարարած է Ռուսաստանի Արտաքին գործոց նախարար Սերկէյ Լաւրով:
Ըստ անոր՝ կան Մատրիտեան սկզբունքները, կան փաստաթուղթեր, որոնք 2010-2011 ստացած են Ռուսաստանի համաձայնութիւնը. խօսքը Գազանի փաստաթուղթին մասին է:
"Անցեալ տարուան Ապրիլին Մոսկուայի մէջ Մինսքի խումբի համանախագահներուն մասնակցութեամբ տեղի ունեցած Ռուսաստանի, Հայաստանի ու Ազէրպայճանի Արտաքին գործոց նախարարներու հանդիպման ընթացքին ներկայացուեցան նախագծեր, որոնք աշխուժօրէն կը քննարկուին։ Այս փաստաթուղթերը կ՚ենթադրեն փուլային մօտեցման հիմքի վրայ կարգաւորման գործընթացի առաջ մղում", յայտարարած է ան:
Լաւրովի համաձայն՝ հակամարութեան կողմերուն կ՚առաջարկուի առաջին փուլին լուծել կարեւորագոյն խնդիրները՝ «Լեռնային Ղարաբաղի շուրջի շրջաններու վերադարձ եւ փոխադրական, տնտեսական ու հաղորդակցութեան այլ կապերու ապաշրջափակում»։
ՀՀ Արտաքին գործոց նախարար Զօհրաբ Մնացականեան մեկնաբանելով Լաւրովի այս յայտարարութիւնը՝ ըսած է, թէ անցնող երկու տարուան ընթացքին Հայաստանի կառավարութիւնն ու վարչապետը աւելի քան թափանցիկ գործած են: Ան յիշեցուցած է, որ փուլային տարբերակը քննարկուած է 2014 եւ 2016 թուականներուն, եւ ան անընդունելի է հայկական կողմին համար:
"2018 թուականին բանակցութիւններ են անցկացուել՝ տարբեր տարրերի հարցով կողմերի մօտեցումների շուրջ։ 2014 թուականին առաջարկուած տարբերակը չի գտնւում բանակցութիւնների սեղանին։ Մենք կոնկրէտ խօսել ենք մեր դիրքորոշումների մասին, խօսել ենք Արցախի ժողովրդի անվտանգութեան մասին։ Ինչ վերաբերում է տարածքներին, ապա հայկական կողմը նոյնիսկ չի կարող քննարկել այդ հարցը՝ սպառնալիքի տակ դնելով Արցախի բնակչութեան անվտանգութիւնը։ Զիջումներ չեն կարող լինել։ Խաղաղ կարգաւորումը հնարաւոր է փոխզիջումների ճանապարհով։ Միակողմանի զիջումներ չեն լինի", յայտնած է Մնացականեան։
Ան յիշեցուցած է, թէ Հայաստան կը մասնակցի բանակցութիւններուն եւ պատասխանատւութիւն կը կրէ, բայց եւ այնպէս լիազօրութիւնը չունի Արցախի ժողովուրդին անունով խօսելու:
ՀՀ Արտաքին գործոց նախարարութեան մամլոյ բանբեր Աննա Նաղդալեան ալ պատասխանելով «Կոմերսանտ» թերթի հարցումներուն՝ ըսած է, թէ Հայաստանի եւ Արցախի համար ընդունելի չեն արցախեան հարցի կարգաւորման փուլային տարբերակ ենթադրող առաջարկները: